Sining ng Tugma at Sukat, Inilunsad sa Cavite at Pangasinan
Inilunsad ng Linangan sa Imahen, Retorika, at Anyo (LIRA), Pambansang Komisyon para sa Kultura at mga Sining (NCCA), at mga katuwang na institusyon ang Sining ng Tugma at Sukat (STS) noong Setyembre 14 sa General Trias, Cavite at noong Setyembre 22 sa Dagupan, Pangasinan.
Ang STS ay isang libreng pagtuturo para sa mga guro ng Filipino sa mga matataas na paaralan sa Kalakhang Maynila at mga karatig na lalawigan. Kasama sa pagtuturo ang mga ehersisyo sa paggawa ng mga tulang may tugma at sukat.
Para sa programa sa Cavite, sina April Imson at Salvador Biglaen ng LIRA ang mga naging tagapanayam. Ang Cavite Young Writers Association ang katuwang ng LIRA at NCCA, samantalang si Romel G. Samson ang naging tagapag-ugnay.
Para sa programa sa Pangasinan, si Prop. Michael M. Coroza ang naging tagapanayam. Ang Dagupan City National High School ang katuwang ng LIRA at NCCA, samantalang sina Renato R. Santillan at Phillip Kimpo Jr. ang mga naging tagapag-ugnay.
Tatagal ang proyekto hanggang Marso 2009, at kabilang ang Rizal, Bulacan, Zambales, at Quezon sa mga balak puntahan ng STS.